O se tala fiafia mo se tasi o aiga i le asō ina ua agai ane le minisita o femalagaa’iga o Andrew Giles ma faataga le aiga e nonofo i Ausetalia ma lē oo ai le tipoti ese ma le atunuu.
O le Alaata 9 a Ausetalia ua lipotia ai le mataupu lea i si aiga ua silia ma le 10 tausaga o aumau i Ausetalia ae na malaga mai Korea i le 2013 ma e fai le latou pisinisi o le Café i Cairns.
Fai mai e 8 tausaga o faia finauga a le aiga e fia nonofo mau i Ausetalia i le mae’a ona lē taliaina le latou talosaga mo se visa tumau mo tomai faapitoa, permanent skilled visa, e mafua ona teena le talosaga ona o le atalii o le ulugalii e aafia i gasegase e aofia ai manaoga tumau, fai mai sa silasila iai le faaiuga o le a avea le tamaititi o se avega i tagata totogi lafoga.
O se mataupu na lāgā ai lagona lē fiafia mai le komiuniti o tagata e aafia i lea gasegase, autism ma se apili mai le tamaitai fai ata tifaga o Chloe Hayden lea foi e aafia i le tulaga lea, ma valaau ai i le minisita mo se fesoasoani.
E silia ma le 30 afe tagata na sainia le petition i luga o upega tafailagi e lagolago ai le aiga lea ma ua tuuina mai ai le tali e ala i se tusi mai le matagaluega o mataupu faalotoifale i le faaiuga a le minisita ua faia i le mataupu.
Ua maua ai nei la le visa o si tamaititi lea ua fitu tausaga le matua ma faailoa ai le agaga faafetai o le aiga i le minisita ona o le agalelei ma le amanaia o se talosaga mai si o latou aiga.
Fai mai le tina o le tamaititi i le aufaasalalau o le a tuu iai lona malosi atoa e faamautinoa e matua ane si ana tama o se tagata Ausetalia e lototele e fesoasoani i soo se tagata e mafai ona fesoasoani iai.
