O le fono a le kapeneta ile ogatotonu o lenei vaiaso ua iai le talitonuga o le a toe silasila ai Minisita i aiaiga o loo faamalosia pea mo puipuiga o Samoa ona o le faamai koviti 19 poo le korona vairusi, aemaise ile tatau ona tauave faamaumauga faalesoifua maloloina e faamaonia ai ua maea ona fai tui puipui o le faama’i.
O loo aiaia foi ile taimi nei e tatau i pasese uma e taunuu i Samoa ona faailoa faamaumauga faalesoifua maloloina ma ia usitaia le faia o a latou siaki faafomai o le koviti 19, i totonu o le 24 itula ao lei ulufale ile vaalele ma malaga mai i Samoa. Ua faailoa e se molimau faatuatuaina o aiaiga uma ia o le a toe iloilo ma faia iai se isi faaiuga pe faaauau pea, pe o le a taofia loa ae toe foi tapenaga o faigamalaga e agai mai ile atunuu i tulaga masani, ao lei pesia le lalolagi ile faamai koviti.
O le aso muamua o le masina o Aukuso ina ua toe tatala malaga masani ma tuaoi o Samoa na faaauau ai pea aiaiga o tui puipui mo tagata malaga uma e afea le atunuu e le gata i pasese ae o au va’a o vaalele. A’o talia ai se isi finagalo o le Malo i aiaiga o loo tumau pea mo puipuiga o Samoa mai le faama’i, ua lipotia e le Samoa Global se faafitauli na tulai mai ile malaga a le Air New Zealand ile aso Toonai na tea nei, ise tasi o le pasese mai Aukilani na taunuu i Samoa ma iloa ai i suesuega o loo aafia ile koviti 19.
Faaalia e lea auauaga faasalalau e tusa ai o aiaiga o puipuiga o lo tatou atunuu, sa le mafai ona tuua e lea pasese le vaalele ma toe poloaina ai le pailate ma le auva’a ia toe foi atu i Niusila ma lea tagata malaga peitai sa ilitata ma le talia e le pailate o le vaalele.
I lea feteenaiga na tulai mai e lua itula o faatali le pasese sa fuafua e malaga ese ma Samoa i lea malaga ao tau soalaupule le mataupu. Ua iai atunuu ua faamuta a latou aiaiga o puipuiga ma ua toe saoloto tagata malaga mai le faaali o faamaumauga e faamaonia ai ua maea ona fai tui puipui, atoa ma isi aiaiga.
