O le kuata lona tolu o le taaloga na amata vaaia ai le suia o ‘ai o le taaloga mai lona amataga lea sa sili mai ai lava le Silver Ferns a o tuli mai ‘ai e le Diamonds a Ausetalia.
Na matua faatumulia le faletaalo i le Gold Coast i Kuiniselani i le autapuai i le sailiga o le ‘au o le a manumalo i le Constellation Cup i le va o Niu Sila ma Ausetalia.
E ta ane le ‘afa o le taaloga o loo sili le Silver Ferns i ‘ai e 30-25 peitai o le toe amata mai o le kuata lona tolu na vaaia ai le osofai malosi a le Taimane ma iu ai ina toe maua atu le Ferns ma sili ai ‘ai o Ausetalia i le mae’a o le kuata tolu 44-38.
E fai foi si tele o nai sasi o le Ferns i pasiga ma isi tulafono o le taaloga i le kuata lona fa ma lē mafai ai ona latou ausia ‘ai sa tuliina o Ausetalia.
E mae’a le taaloga Diamonds a Ausetalia e 57, Silver Ferns a Niu Sila e 53.
Lona uiga ua sola nei Ausetalia ma le ipu lea seia aulia foi le tausaga fou.
Sa mataina le taalo a le tamaitai o Ameliaranne Ekenasio.
