O se alii mai Melepone lea na taofia a o taumafai e agai i se faigamalaga i Indonesia, o ia lea le isi e atoa iai le toalua o alii ua molia i le maua o fualaau faasāina e 2.5 kilo na maua i le tuatusi o se pisinisi Melepone.

O lē ua taofia o se alii 32 tausaga mai Keilor Downs na pueina i le malaevaalele i Darwin i le Aso Faraile a o taumafai e agai ese i se malaga faavaomalo ma ua molia i le feaveaiina o se vaega tele o le fualaau faasāina o le cocaine. 

Ua mae’a ona tulai i se faamasinoga i Darwin ma ua toe aveina ane i Melepone ma na tulai i le faamasinoga i le Aso Gafua.

Na sueina e leoleo ni fale i faaitu ia o Melepone ma maua iai ma ni taavale taugata ituaiga o le Ford Ranger, Porche ma isi.

O le isi alii na molia e 33 tausaga mai Malvern East ma e tulai i le faamasinoga i le masina o Tesema.