O le toe poupou o le lumanai o aiā i le saolotoga e faaali ai manatu ma lagona e agavaa iai tagata uma, o le autu lea ua faatāua e Malo Aufaatasi i lenei tausaga, i le faamanatuina o le aso faavaomalo mo le saolotoga o tagata uma o loo galulue ma tautua i tomai faatusitala ma faasalalau poo le World Press Freedom Day e faamanatu i le aso 3 o Me i tausaga taitasi.
I Samoa ua faailoa e le faalapotopotoga o tusitala ma le aufaasalalau le JAWS i se pepa o faamatalaga, ua le faia se polokalame i le aso 3 o Me, ae ua taatia atu i le faaiuga o le masina nei lea e taualuga iai polokalame o le 60 tausaga o le tutoatasi.
E le o faailoaina e le faalapotopotoga le mafuaaga ae ua lua tausaga talu mai tausaga sosoo o le 2021 ma le 2022 e le o toe faia ni polokalame a le faalapotopotoga e faatāua ai lea aso faavaomalo.
O mafuaaga ua faailoa e le JAWS i lana pepa o faamatalaga, o le pipisi o le faamai koviti, ma tulaga le mautonu na aafia ai upufai o le tatou Malo i le mae’a o le palota tele i le 2021 na le faia ai se polokalame.
O le faalapotopotoga o le UNESCO o se tasi o auaunaga a Malo Aufaatasi o loo taulamua i le ofoina o fesoasoani tupe mo itutino o vaaia le galuega a tusitala ma le aufaasalalau i le lalolagi, mo le faia o ia polokalame.
O Samoa le isi poutu toa i le li’o o atunuu laiti o le Pasefika i le unaia ma le siitia o le saolotoga o galuega faatusitala ma faasalalau o ni tomai faapitoa.
