Ua toe oso maualuga foi le aofai o tagata aafia ile koviti 19 I totonu o Niu Sau Uelese lea ua oo atu ile 16,288 pei ona faamaonia mai lipoti mai le soifua maloloina ile aso. E toafa isi tagata ua maumau soifua ona o le faamai.
A fua atu iai ua silia ma le 3 afe le eseesega o le aofai na iai o tagata aafia ile aso ananafi ma le aso. E 991 tagata o loo taofia I falemai I Niu Sau Uelese ma o loo aafia ile koviti. Ua taua foi e le NSW Health pe a ma le 56.3 pasene o tagata ua maea ona faia uma tui puipui e tolu o le faamai.
O loo lipotia foi e talitonuina o le toe siitia o le numera o tagata aafia e mafua mai ina ua toe tatala aiaiga o sa na iai ile setete ma ua tele ina toe fesootai tagata ina ua agai I galuega, aoga ma le soifuaga e pei ona iai muamua.
Ua faailoa ise saunoaga ale minisita o le Soifua Maloloina, Brad Hazzard e manatu o le a faaluaina le aofai o tagata aafia I leisi fa ile ono vaiaso o muamua. O le subvariant ua faaigoa o le Covid 19 BA 2 o seisi vaega o le omicron mae foliga e pito vave foi lona pepesi ma e ono iai foi ni ona auga e ogaoga atu.
