Ua toe maua ma o loo manuia uma le auso teine mai Ausetalia i Saute lea na tau sailia mai le faaiuga o le vaiaso talu ai ma faailoa atu foi i talafou. 

O Daniela ma Indiana, e 7 ma le 5 tausaga le matutua na tau sailia mai i le Aso Toonai talu ai ma faia ai suesuega a leoleo ma tuuina foi faamatalaga i luga o upega tafailagi ona o popolega i lo la saogalemu.

O le tea o le fitu i le po anapo na faailoa mai ai ua toe maua i laua ia ma o se tala fiafia mo o la aiga aemaise lo la tamā ma le la tina fai o Stephanie Mende lea na ia faailoa o se tulaga aupito i faafefe tagata lea lagona aemaise o le leiloa poo fea o iai.

O nisi lipoti na ta’ua ai e masalomia na ave e lo la tina ae ua faailoa e leoleo o le itu e faafetaia ai ona ua faamaonia ua toe maua ma o loo manuia uma teineiti e toalua.