Ua toe molimauina le faaauau pea ona maua e leoleo i se osofaiga i le faaiuga o le vaiaso na tea nei, le iai pea o nofoaga o loo faafailele ai le pauta faasāina o le ‘aisa (meth) o se nakoti.
Ua faailoa e le Komesina o leoleo i se lipoti i le amataga o le vaiaso, se osofaiga i le Aso Toonai ua mavae na maua ai le ‘aisa ma ni tupe i se nofoaga i Moamoa.
E toalima na taofia i le mae’a o lea osofaiga mo suesuega atili a leoleo.
O loo faailoa e le Komesina o leoleo i le lipoti a le nusipepa o le Samoa Observer, o se tasi o i latou ia ua taofia o se tagata faigaluega sinia i le faalapotopotoga o le faaputugatupe o le lumanai manuia o tagata le NPF.
E lima afe tala se tinoitupe na maua ai i le nofoaga i Moamoa na agai iai le osofaiga a Malu o le malo, faapea ni masini faatekonolosi.
Ua molimauina o vaega foi faapea sa maua i nisi o osofaiga a leoleo talu ai nei ma ni nai tausaga e lei mamao tele atu.
A o faagasolo ai pea suesuega i lea mataupu tau solitulafono e aafia ai pauta faasāina o le ‘aisa, e lei faamautuina se aso o le a oo ai ni moliaga o i latou ua taofia i le faamasinoga.
