Ua toe faaopoopo foi se tasi o faamanuiaga poo se faailoga tāua mo le alii taalo o le All Blacks o Ardie Savea lea na mauaina foi le faailoga o le tama taalo o le tausaga i Niu Sila nei i se sauniga na faia i le po anapo.
O le faalua ai lea ona faamanuiaina Savea i le faailoga lea ae e lei mamao atu ona ia mauaina foi le tama taalo o le tausaga i le lakapi a le lalolagi e pei ona fofogaina i le faatoa mae’a o le Ipu o le Lalolagi talu ai nei.
Fai mai o le tolu sosoo ai foi lea o tausaga o avea pea ma tama taalo o le tausaga i le All Blacks.
O isi faailoga e aofia ai le maua e le ‘au a alii Niu Sila i le taitoafitu o le ‘au o le tausaga ma le faiaoga o le autaitoafitu a tamaitai Cory Sweeney na mauaina le faiaoga o le tausaga i Niu Sila nei.
E lua isi faailoga faaopoopo i le tausaga nei o le Te Hapai NZ Rugby community impact award na maua e Steven Li ae o le Auckland Uni Rugby Football Club na mauaina e le Bunnings Warehouse Rugby club of the year.
O Allen Grainger mai Waikato sa mauaina le Volunteer of the year award ae o le alii laufali faavaomalo o Ben O’Keeffe na mauaina le laufali o le tausaga mo le faafā ai lea o taimi.
I taaloga faaitumalo na maua e Siu Kakala mai South Canterbury le Ian Kiripatrick Medal, maua e Krysten Cotterell mai Hawkes Bay le Fiaoo Faamausili Medal ma Etene Nanai Seturo o Counties Manukau na mauaina le Duane Monkley Medal.
