Ua lauiloa le afioaga o Moataa i le itumalo o Vaimauga 2 i le taleni a tina e ala i le falasu’i. O se taleni ua leva tausaga o faia mai e tina matutua ua mavae, ma faasolo mai ai i tamaitai o le afioaga ma augatupulaga o le talutalu fou lenei.
Na faailoa e le sui tamaitai o le nuu ia Samalaulu Keri Liaga, o le vaevaega o la latou tupe muamua lea ua faamatuu atu, na talanoa ai tamaitai ma malilie ai i ni poloketi e pei o le su’isu’i atoa ai ma le falasu’i e fia faia.
Sa faatau atu laau su’isu’i e 10, faapea foi laufala ma vulu mo le faamoemoe. Na ia ta’ua o le ata muamua na tuuina i luga o la latou facebook page ua le malolo ai loa le talosaga atu o tagata o le atunuu mo ni oka o falasu’i.
O le fuafuaga lava ia e pei ona ta’ua ia toe lalaga le taleni ae i lea lava taimi e tasi ua maua ai le seleni mo aiga ma fanau aoga.
O le aualuma e silia i le 40 tamaitai o le afioaga ma na ta’ua e Samalaulu ua le faaitiitia le agaga fiafia o fanau teine e su’i le fala.
E ono fala o loo su’i i le taimi nei, e tusa ma le $500 i le $600 le afa falasu’i ae lata i le $1000 pe sili atu foi le fala e su’i atoa.
Na ta’ua e le sui tamaitai o le afioaga ua le gata ina toe maua le tupe sa faaaoga o le poloketi ae ua iai foi faasiliga mo ē o loo galulue e su’i fala.
E iai isi poloketi o loo tilotilo foi iai Tamaitai o le afioaga mo nisi seleni o loo mulimuli atu o le 1 miliona poloketi a le malo lea o loo faasafua nei i itumalo e 51.
