Atonu o le tutu faatasi o le tapuaiga a Samoa aoao i soo se tafa o le lalolagi e aofia ai ma lo tatou atunuu e tapuaia le taaloga mulimuli a le Toa Samoa e saili ai le siamupini o le Ipu o le lalolagi i le lakapi liki, ua fetaui lelei ma le toe fusia faatasi o fanau a Kolisi o Sagato Iosefo ma Leifiifi i le fealofani, ina ua faatasia ia kolisi e lua ma faatino se leleiga, e taofia ai le toe feaina’i ma faatupu ai ma vevesi, e pei ona sa molimauina i se vaiaso e lei mamao atu.
O le amataga o lenei vaiaso na faia ai lea leleiga i le maota Samoa o le Matagaluega o Aoga Taaloga ma Aganuu i Malifa, sa auai e le gata i fanau a ia kolisi, ae o ulu a’oga ma faiaoga ma le Komesina o le Matagaluega o Leoleo, Falepuipui ma le Ola Toe Fuataina le susuga Auapaau Logoitino Filipo.
O le Komesina na ia momoli i se saunoaga upu tima’i ma apoapoai i fanau ma tuusa’o iai le fautuaga, e le ‘alo le tulafono i le faia o le mea e tatau ona fai i ni fanau e solia le tulafono e mafua i vevesi i nofoaga faitele.
O timaiga foi ma fautuaga faifai pea na faaleo e pule a’oga o Sagato Iosefo ma Leifiifi faapea le sui o le matagaluega o aoga taaloga ma aganuu i lea feiloaiga, ma le naunautaiga ina ia aua lava nei toe tulai mai nei vevesi e tauleagaina ai aoga, matua ma le atunuu, ae o le tele ai o se aafiaga ia i latou lava o ē taitaia ma faatupuina ia vevesi.
O le feiloaiga a tusitala ma le Komesina o leoleo i lenei vaiaso o le a maua ai se tala lata mai ia latou suesuega pe ua molia nisi o fanau a’oga a ia kolisi i le faatupuina o ia vevesi.
E toalua ni fanau aoga ua muamua molia ona o le umia o ni aupega matautia o ma’a, lea sa maua i le tiute a leoleo i le taulaga i le nofoaga faatali pasi, i le Aso Gafua na tea nei.
