E limaafe tagata i lo tatou atunuu na oo iai le galuega faafomai ma tausi soifua o le polokalame ua faaigoaina o le soifua manuia, lea sa faatino e se aumalaga o fomai ma tausi soifua mai le fitafita a le Malo tele o Amerika.
O le limaafe o tagata na vaaia ma faatino iai togafitiga sa agai ane i falemai e fitu i le atunuu sa faatino ai lea galuega i le masina o Aperila, lea e lima falemai i Upolu ae lua i Savaii.
Ua faailoa e le ofisa o le Malo Amerika i Apia, ua toe faagasolo nei tapenaga mo le toe afea o le tatou atunuu e lea polokalame ona ua molimauina le tāua ma le manaomia tele e o tatou tagata.
O le faaiuga o le masina fou o Iuni o le a toe malaga mai ai fomai ma tausi soifua a le fitafita a Amerika mo le isi a latou polokalame o le soifua manuia.
A o iai i Samoa lea aumalaga sa maua le avanoa e faatino ai ni a latou polokalame fetufaa’i ma nisi o auaunaga a le Malo e pei o le vaega o le fuimu ma auaunaga i taimi o faalavelave faafuasei, faapea le matagaluega o le soifua maloloina.
