O le asō ua faalēaogāina ai e le Faamasinoga Maualuga le faai’uga na faia e le Palemene ma faamālōlō ai seia iai se aso, le ta’ita’i o le HRPP, Susuga Tuilaepa Lupesoliai Sailele Malielegaoi, ma le failautusi a le vaega faaupufai, le Tofa Lealailepule Rimoni Aiafi.
O lenei mataupu na tula’i mai i le aso 24 o Me 2022, ina ua talia e le Palemene le lipoti a le komiti na su’esu’eina le tusi faaseā a le sui faipule, o le Sui Palemia foi lea, le Afioga Tuala Tevaga Iosefo Ponifasio, sa faasaga i sui faipule na faasala, ona o le solia o tulafono o amioga taualoa i totonu o le Palemene.
Peiitai la sa ave e sui na faamālōlō lenei faai’uga a le Palemene e lu’iina i le Faamasinoga, i luga o le la mau, ua solia e lenei faai’uga a le Palemene, a la aiātatau e fai ai se leo o o la itumalo i totonu o le Palemene, ma le lē maua ai o ni o la totogi mo se vaitaimi e lē iloa le umi, ona o le faaupuga o le faai’uga na aumai, e faamālōlō seia iai se aso.
E le’i umi talu ona sau i tua le faai’uga a le Faamasinoga, ae faaali mai loa i luga o le itulau a le vaega faaupufai a le HRPP se saunoaga faalauaitele a le afioga i le ta’ita’i o le Itu agai, e faaleo mai ai le agaga fiafia ma le faafetai i le faai’uga ua aumai e le Faamasinoga mo le la mataupu.
Maitauina i le saunoaga atoa a Tuilaepa, e le’i toe aga’i lava ni ona lagona e faitioina ai le faai’uga na faia ia laua ma Leala, ae sa na o le faafetai lava ua tali mai le Atua i le la faamasinoga, faafetai i le Faamasinoga i le latou silasila toto’a i le la mataupu, ae na aga’i le tele o lana saunoaga i le taumafai loa o itu e lua e galulue faatasi.
I se taimi o i luma ona toe faaatoa atu lea o lenei mataupu, aemaise o le auiliiliga o le i’uga a le Faamasinoga, peitai o lenei faai’uga a le Faamasinoga i le asō o se tala fiafia lea mo le vaega faaupufai a le HRPP aemaise foi le latou aulagolago.
