Ua tusi aao le faigamalo o loo tulai mai le pulega o le atunuu i le taimi nei, e toe tofia ma faafoi atu le Susuga Papalii John Taimalelagi Afele, e toe tauave le tofiga o le Ofisa Sili o Pulega mo le Matagaluega o Faamasinoga ma le Faafoeina o Tulaga Tau Faamasinoga a Samoa.
O le afiafi o le Aso Lulu, 21 Tesema 2022 na faalauiloa mai ai i tua i se pepa o faamatalaga mai le malo lenei tofga tāua a le atunuu ua faamaonia mai e le Kapeneta.
O le susuga Papalii e le o se tamalii e fou i lenei matagaluega, e pei foi ona sa ia tauaveina ai muamua lenei tofiga i le silia ma le 10 tausaga sa tautua ai o se Ofisa Sili Lagolago seia oo ina tofia e avea ma Ofisa Sili o Pulega i le tausaga e 2016 ae na toe faamutaina i le 2019.
E tusa o le pepa o faamatalaga mai le Malo, o le susuga Papalii o loo ia umia faailoga taualoa o le Bachelor of Art Degree mai le University of South Pacific poo le USP i le tausaga e 2003.
Sa faauu mai lona tusipasi taualoa o le Certificate of Samoa Customary Mediation mai le Otago University ae tofia nei Papalii i le tofiga ua tulai mai ai, o lea ua savali lona tausaga lona fa i le faailoga o loo faia ai nei ana suesuega o le Bachelor of Law (LLB) i le Auckland University.
