Ua faamaonia nei le toe aga’i mai o le tamaitai iloga i le taaloga o le lakapi a Niu Sila e toe taalo mo lana ‘au o le Black Ferns, o Portia Woodman-Wickliffe, ina ia toe maua lona avanoa e taalo ai mo lona atunuu i le Ipu o le Lalolagi.
O le tamaitai o Portia o se tamaitai taalo ua mālōlō mai taaloga faavaomalo, peita’i o se tala fiafia lenei mo nisi o sui o le ‘au le toe foi ane ai o lea tamaitai.
Ua faamauina i lipoti, e 8 masina le konekarate ua mae’a sainia nei e Portia ma le Iuni Lakapi a Niu Sila.
O Portia o se tasi o teine taalo lakapi i Niu Sila o loo ia umia le tele o matāti’a e pei ona ia umia le tagata aupito i tele ana sikoa faamauina i le talafaasolopito o le Lakapi o le Lalolagi.
Na faaalia e lenei tamaitai, na tonu lona mafaufau i le toe foi e taaalo faavaomalo a o iai i taaloga o le Sky Super Rugby Aupiki.
Na faalauiloa e Portia lona mālōlō poo le litaea mai taaloga faavaomalo i le tausaga talu ai i le mae’a ai o taaloga o le Olimipeka i Pale i Falani lea na manumālō ai le latou ‘au i le su’ega siamupini.
Puna o Faamatalaga: https://www.rnz.co.nz/news/sport/558743/black-ferns-legend-portia-woodman-wickliffe-comes-out-of-retirement-for-rugby-world-cup
