O le iai o le ofisa ua faagaioia le polokalame o galuega faavaitaimi ina ua faasee atu le vaaia o lea polokalame i le Matāgaluega o Tupe a le Malo, o lea ua iai se isi fetuuna’iga ina ua ulufale atu le faigāmalo fou i le toe foi o le vaaiga o galuega faavaitaimi i le Matāgaluega o Alamanuia, Pisinisi, ma Leipa sa iai muamua, ina ua faasee iai le polokalame sa muamua faatino mai le Matāgaluega a le Palemia ma le Kapeneta.
Ua faailoa lea fesuia’iga e le Minisita o Tupe o loo tauaveina tiute o le Palemia ina ua feiloa’i ma le vasega o tusitala ma le ‘aufaasalalau i le faai’uga o le vaiaso ua mavae.
Le Minisita o Tupe o loo tauaveina tiute o le Palemia le afioga Mulipola Anarosa Ale Molioo.
O le faatinoina e ofisa o Fono Faavae o galuega e sa’ili ai tagata i galuega faavaitaimi o se tasi o suiga sa pasia e le faigāmalo talu ai.
