I le valu tausaga na pulea ai e le Faalapotopotoga o Vaa a Samoa le Samoa Shipping Corporation uafu i Satitoa, o Mulifanua ma Salelologa, o lea ua toe foi atu nei le vaaia ma le faagaioia, atoa ai ma le pulea o ia aseta taua a le Malo, i le Pulega o Uafu le Samoa Ports Authority.
Ua lipotia e auala o faasalalauga o loo pulea e le Malo, o le aso muamua o Oketopa na faamautu ai lea faai’uga ina ua mae’a ona talanoaina e le Kapeneta.
O le uafu i Satitoa i se faatalanoaga ma le Minisita o Galuega tetele i se masina e lei mamao atu, na ia faaalia ai o loo iai se fuafuaga e fausia ai se nofoaga mo vaa faila.
O se atina’e na faaalia e le Minisita le tofa Olo Afoa Fiti Vaai, o le a afea ai e vaa faila ma tagata tulisi e malaga mai ai, lea vaega o Upolu ma faaaoga ai atina’e tau tagata tafafao o loo i lea faaitu o Upolu.
O le tausaga e 2012 na faagaioia ai lea uafu ina ua mae’a ona toe fausia i se tupe e valu miliona tala Amerika, peitai o le mae’a o le tausaga ma masina na faaaoga ai mo malaga tai vaiaso i le va o Samoa ma Amerika Samoa, na taofia ai ae toe foi mai ia malaga i le uafu tele i Apia.
O loo taatia pea lea uafu i le taimi nei e le o toe faaaogaina.
