Ua toe foi e faaauau o la tiute e tautua le Malo ma le atunuu i o la tofiga le Ofisa Sili o pulega o le Matagaluega o Alamanuia, Pisinisi ma Leipa le susuga Pulotu Lyndon Chu Ling, ma se tasi o Ofisa sili lagolago o lea matagaluega a le Malo le afioga Tofilau Mathew Tofilau, i le tuanai o ni vaiaso sa faamalolo le tumau ai, a o suesueina e le Komisi o galuega a le Malo le mataupu o le lē usitaia o le faaiuga a le Kapeneta e taofia lē tumau le toe malaga o nisi mo galuega faavaitaimi i Niu Sila ma Ausetalia i le masina o Ianuari. I se pepa o faamatalaga mai le ofisa sooupu o le Malo ua faailoa ai:

“Ua mae’a le suesuega a le Komisi o Galuega a le Malo e uiga i le mataupu tau i galuega faavaitaimi, na afua ai le faamalolo lē tumau o le Ofisa Sili o Pulega o le Matagaluega o Pisinisi, Alamanuia ma Leipa – Pulotu Lyndon Chu Ling, ma le Sui Ofisa Sili Lagolago o le Vaega o le Matagaluega o loo gafa ma Galuega Faavaitaimi – Tofilau Matthew Tofilau. Sa lauliliuina e le Kapeneta i le vaiaso nei le lipoti o lenei suesuega, ma faaiugafonoina ai e faavae i fautuaga a le Komisi e faapea”;

1. Le faamutaina aloaia o le faamalolo lē tumau o le Ofisa Sili o Pulega – Pulotu Lyndon Chu Ling ma le Sui Ofisa Sili Lagolago o le Vaega o le Matagaluega mo Galuega Faavaitaimi – Tofilau Matthew Tofilau, ma ua aloaia le toe faaauauina o a la auaunaga ua tofia ai.
2. Le tuuina atu o le lapataiga malosi ia Pulotu ma Tofilau, e tusa ma aiaiga o le Tulafono o Tagata Faigaluega a le Malo 2004, ina ia saga matimati ma mataala i le faatinoina o o la tiute ma matafaioi. 
3. Le taoto atu i le Komisi o Galuega a le Malo isi mataupu na aofia i lenei suesuega e faatino, e tusa ma aiaiga o le Tulafono o Tagata Faigaluega a le Malo 2004.
4. Le faamalosia o faiga faavae ma auala o loo faatonutonu ai galuega a le Matagaluega o Pisinisi, Alamanuia ma Leipa, mo le mataituina lelei o faatinoga uma a le aufaigaluega, o loo feagai tonu ma galuega faavaitaimi mo Niu Sila ma Ausetalia”.

E pei ona silafia o le mae’a o suesuega faalotoifale a le Matagaluega o Alamanuia, Pisinisi ma Leipa i le mataupu lenei, na tuuina atu ai e le sui Minisita o le Matagaluega le afioga Toesulusulu Cedric Schuster, le lipoti i le Kapeneta, o loo faailoa ai suafa o nisi o tagata faigaluega i le vaega o galuega faavaitaimi sa lotolotoi i le faia o tapenaga mo le malaga i fafo o nisi o aumalaga mo galuega faavaitaimi i le masina o Ianuari, ae ua mae’a taoto le finagalo o le Kapeneta e taofia le tumau le toe malaga o nisi.

O le taunuuga o lea suesuega o loo silasila nei iai le Komisi o galuega a le malo.