Ua lē manuia le finauga muamua a loia o loo tulai mo le susuga Tiumalumatua Maifea Fetu, e lē mafai ona faamasinoina i Samoa lea tamalii ona o le moliaga solitulafono a leoleo o le faia o se faasalalauga taufaaleaga e pei ona sa finau loia a lē ua molia e le’i faia ia faasalalauga i Samoa ae o Ausetalia.
O lea ua faatali nei se faai’uga a le faamasinoga faaitumalo i le isi finauga faaletulafono a lē ua molia ma ana loia, e leai ni mau a leoleo e faamaonia ai le moliaga poo le no case to answer.
O le finauga lea na tuuina atu i taualumaga o le mataupu lenei i le Aso Faraile na te’a nei, ina ua mae’a ona valaau le molimau muamua a leoleo, o lē sa faauluina le tagi o le Failautusi o le vaega faaupufai o le Faatuatua i le Atua Samoa ua Tasi.
O le molimau lea na ta ai le lipine o se polokalame a lē ua molia sa ia faia ai ni tuua’iga o le pepelo agai i le ta’ita’ifono o lea vaega faaupufai, ma se faamatalaga sa faatūtū i le faai’uga a le faamasinoga sili na aloa’ia ai le manumalo o le Faatuatua i le Atua Samoa ua Tasi i le palota tele ma avea ai ma faigamalo fou.
E le’i mafai ona oo atu isi molimau e to’alua a leoleo o ni Minisita lagolago, o le isi o loo malaga i fafo a o le tasi sa malaga i Savaii i se tiute faalemalo ma lē mafai ai ona auai atu.
Sa oo se finagalo o le faamasinoga i le itu a leoleo ona o tapenaga o le mataupu e le’i atoatoa. Ua tālia nei la se faai’uga i le talosaga a le itu o loo faasaga iai le tuua’iga, lea o loo finau ai ua lē mafai e leoleo ona faamaonia le latou moliaga.
