Ua tā’ape le fonotele i Malua o lenei tausaga ma ua toe taliu i aulotu faafeagaiga ma sui o le aumautofi mai Pulega ma Matagaluega sa usufono, ina ua faai’uina ma le manuia le tauaofiaga o le fono faaletausaga masani a le Ekalesia Faapotopotoga Kerisiano Samoa.
O le taualuga masani o galuega a le fonotele o le filifilia o ona ta’ita’i ma isi tofiga tāua i le pulega o le ekaleasia aoao, ma ua toe filifilia ai le faafeagaiga o le Ekalesia EFKS i Sapapalii susuga Auatama Esera e na te toe tauave le tofiga sui ta’ita’ifono ma o le ta’ita’ifono faaolioli foi pe a mae’a le fonotele o le tausaga fou 2025.
O le fonotele o le tausaga na te’a nei na filifilia ai e usugafono le susuga Auatama e na te tauave le tofiga ta’ita’ifono ina ua valaau le Matai Sili i le susuga i le Toeaina sa tausia le aulotu EFKS i Lotofaga susuga Iosefa Atapana Uilelea, sa avea ma ta’ita’ifono.
O le fonotele muamua lenei ua tusi aao le ekalesia aoao e ala i lana palota faalilolilo i le susuga Auatama Esera e toe seei i le tofiga sui ta’ita’ifono.
O le susuga i le Toeaina Faatonu, Tunumoso Iosia sa sui ta’ita’ifono ua ia tauave nei le tofiga ta’ita’ifono aoao o le ekalesia aoao.
Ua toe filifilia le susuga i le faifeau, Melepone Isara e faaauau ona avea ma Teutupe o le ekalesia.
O loo tumau foi isi tofiga i le laulau o le pulega a le ekalesia EFKS.
