Ua faamaonia e le Kapeneta le toe tofia o le Afioga ia Sooalo Falelima Kuresa Sooalo, e tauaveina tofiga o le Ofisa Sili o Pulega o Uafu ma Taulaga a Samoa (Samoa Port Authority), e pei ona faalauiloa lautele e le ofisa sooupu o le Malo.
Ua tolu ai nei nofoaiga sosoo taitolu tausaga, o ave pea le faatuatuaga o le Malo i le Afioga Sooalo, auā le taitaia o lea itutino tāua o le Malo e ala i le Pulega o Uafu ma Taulaga.
O se tamalii ua faamauina le lava o lona silafia, i le faafoeina ma le taitaiga o lea auaunaga a le Malo, e pine faamau ai le $20 miliona o tupe faasili sa toe faafoi atu e le Pulega o Uafu ma Taulaga (S.P.A.) i le Malo (dividend) e ui i le tele o luitau sa feagai ai ma le Pulega e aofia ai ma aafiaga o le Koviti-19.
O Sooalo foi o loo taulamua i le tele o Poloketi o loo faagasolo i le taimi nei auā le siitia pea o le auaunaga ma le tautua a le Pulega o Uafu ma Taulaga i le atunuu lautele.
Sa galue i le Pulega o le Faletupe o le A.N.Z. i le tele o tausaga ua mavae, ae 15 tausaga o avea ma Ofisa Sili Lagolago mo le Faalapotopotoga o Vaa a Samoa (S.S.C.) a o lei tofia ai e le Kapeneta o le faigamalo ua mavae, na te taitaia le S.P.A. i le tausaga 2017.
O ona soifua aoaoina na amata aoaoga a Sooalo mai le aoga tulagalua a Samauga i Savaii, sosoo ai ma le Aoga Maualuga a Leififi ma ulufale atu ai i le Kolisi o Samoa.
Na faauu mai le Iunivesite Aoao o Samoa (N.U.S.) i le tausaga e 2000 i lona Faailoga Taualoa o le Bachelor of Commerce – Accounting B.Com a o le 2007 na toe faamanuiaina ai foi mai lona Faailoga Taualoa o le Master of Business Administration (M.B.A.) mai le Iunivesite a le Pasefika i Saute (U.S.P.).
