I le tuanai o le 3 tausaga muamua na avea ai le afioga Faumui Iese Toimoana ma Ofisa Sili o le pulega o le faalapotopotoga a le Malo o loo faagaioia le auaunaga o le malosi faaeletise, o le fono a le Kapeneta o le aso 22 o le masina na tea nei o Novema, na toe filifilia ai lea tamafanau a le atunuu e na te faaauau ona tauave lea tofiga mo le isi 3 tausaga.
Ua faailoa i se pepa o faamatalaga mai le ofisa sooupu o le Malo, o lea tamalii ua 29 tausaga o tautua i auaunaga tau malosiaga ae o le 20 o ia tausaga o totonu lava o le faalapotopotoga tau eletise sa galue ai.
Sa galue i le tasi o auaunaga a le Malo le Pulega o le Suavai mo le 5 tausaga ma o se tamalii ua lava lona silafia i lana matata aemaise ai o le tele o lona tomai i lea ituaiga galuega e pei foi ona galue ai o se faufautua mo le asosi o malosiaga faafouina mo atunuu o le Pasefika.
O loo ia umia faailoga maualuluga i le faainisinia e pei ona iai le Master in Engineering Science mai le Iunivesite Faatekonolosi o le setete o Kuiniselani Ausetalia i le tausaga e 1999, ma le faailoga o le Bachelor of Engineering mai le iunivesite o Curtain i le tausaga e 1994.
E toalua na talosaga i le avanoa o le Ofisa Sili o le malosi tau eletise le EPC ma toe filifilia ai Faumui Iese Toimoana.
