O le afiafi ananafi na faalauiloa mai ai nisi o fetuunaiga o Matagaluega atoa ai ma le faaopoopoga o Minisita e toalua o le Kapeneta na faailoa mai lea tulaga i le saunoaga faalauaitele faapitoa a le Tamaitai Palemia Afioga Fiame Naomi Mataafa.
Ua filifilia le Tofa Lautimuia Uelese Afoa Vaai e avea ma Minisita o Matagaluega o Tupe, ua faapea foi ona tuuina atu iai le vaega o Galuega Faavaitaimi i lana vaavaaiga.
O le Afioga Laumatiamanu Ringo Purcell ua filifilia e avea ma Minisita o le Matagaluega o Taaloga ma Alaga’oa mo le soifua fiafia o tagata le Sports and Recreation.
O fetuunaiga i matagaluega e aofia ai le tuuina atu o le Matagaluega o Tina ma Tamaitai Atina’e o Nuu ma Afioaga ma Aga Fesootai i le Afioga Mulipola Anarosa Ale Molioo lea sa ia tauaveina le Minisita o le Matagaluega o Tupe.
Ua see mai le Afioga Leota Laki Lamositele na te tauaveina se tasi o matagaluega sa tauaveina e le Tofa Leatinuu Wayne Sooialo le Matagaluega o Pisinisi Alamanuia ma Leipa.
O le a tauave tasi e le Afioga Leatinuu le Matagaluega o Faalapotopotoga a le Malo.
Ua see atu le Faalapotopotoga o tagata Tafafao maimoa mai Fafo i le afioga i le Tamaitai Palemia o le vaega lea sa vaaia e le Afioga ia Toeolesulusulu Cedric Schuster.
O loo tumau pea le Matagluega o Puna’oa Faalenatura ma le Siosiomaga i le Afioga Toeolesulusulu, peitai ua faaopoopo atu iai le vaega tau eleele e iai Fanua o le Malo le SLC, o le STEC, atoa ai ma le Land Board.
Na saunoa le Tamaitai Palemia o le faaopoopo ai o Minisita e toalua e fesoasoani i le galuega a le Kapeneta o loo i le Tulafono Faavae ma ua faaatoa ai le numera e 15 e pei ona iai aiaiga i lalo o le Tulafono.
Ua faailoa foi faatoa amata faamamaluina ia suiga o tofiga i le aso muamua o Oketopa o le tausaga nei.
