Ua toe feoai trains a Ueligitone lea na taofia mo le silia ma le 5 itula ona o le faaletonu o uaea eletise.
E latalata i le itula e tasi i le aoauli ananafi na amata taofia lē tumau ai trains feoai, peitai faatoa toe tatala feoaiga i laina i Johnsonville ma Kapiti i le itula e 7 anapo, a o isi uma laina faatoa toe tatala mo feoaiga i le ‘afa o le 8 i le po lava anapo.
O le motusia ai o le eletise ma aafia ai laina nei ananafi na mamau ai ma le 139 pasese ma tagata faigaluega e toaono a o tutū ai trains e tolu ua lē mafai ona minoi.
I le lipoti a le Stuff o loo ta’ua ai e nisi e lei faigofie le lē mafai ona tatala o faitotoa o le train i le taimi na tu ai, ma i le silia ma le lua itula o lē minoi na faaaogā ai loa le faitotoa i le pito i luma o loo iai le avetrain ma faaaogā le auala e o ai i fafo ma le train ona ua fia maua se ea.
Mai nisi o pasese na aafia, mai le tele o aso, o lea na tupu tonu lava i le aso na matuai iloga ona vevela ai le tau.
Mai le Metlink ua ia faafetaia pasese na aafia ona o le lava onosai, ma o lea lava foi sa taumafai e ave iai faguvai i le taimi a o poloka ina ua lē minoi le train a o iai i le va o nuu.
