Ua faasilasila mai e le afioga i le Palemia, ua toe faaumiumi atu seia aulia le aso 30 o Iuni, le umi o le a pa’ū ai pea le lafoga o le tau o le suauu ma le ‘afa o totogi o pasese i luga o auala o femalagaa’iga lautele i totonu o Aukilani.
O lea faasilasilaga a le alii Palemia na tuuina mai ina ua mae’a se la asiasiga ma le Minisita o Tupe, Grant Robertson i le Moana Nui A Kiwa Hub i Magele i le taeao nei, lea na la talanoa atu ai i tagata na afaina i lologa na tutupu faafuasei i le tele o vaipanoa o le Motu i Matu o Niu Sila, ma fesoasoani foi i nei tagata i le la’uina o latou pusa o taumafa mo latou aiga.
O nisi o mea na aofia i lena faasilasilaga i le taeao nei:
- Ua faaumiumi atu le tau e 25 sene le pa’ū o le lita o le suauu seia aulia le aso 30 o Iuni 2023 – e tusa ma le $17.25 le fua faatatau ua pa’ū ai le 60 lita o se tane suauu
- O le a toe amata ona maua discount mo tagata o loo faaaogāina luga o auala mo femalagaa’iga (road user) ma faaauau atu ai seia aulia le aso 30 o Iuni
- E faaauau pea le ‘afa o totogi o pasese i luga o auala o femalagaa’iga lautele seia oo i le faaiuga o Iuni 2023, o se faamāmā avega mo se tagata o loo totogia ni pasese se lua ta’i $5 i le aso pe $25 i le vaiaso
- E amata i le aso 1 o Iulai 2023, o le a faatumau le ‘afa o le pasese mo auala o femalagaa’iga lautele, i le tusa ma le miliona tagata o loo umia Community Service Cards, e aofia ai ma fanau aoga faaiunivesite.
