O le fuafuaga a le Malo e ala i le tala faatatau o le tupe fou lea o le a amata ona soalaupule e le Palemene i lana tauaofiaga e amata i le Aso Lua o le vaiaso nei, ua aofia ai ma le siitaga fou o totogi mo tofiga taualoa e pei o le Ao o le Malo, Sui o le Fono a Sui Tofia, Palemia ma Minisita o le Kapeneta, o Minisita lagolago, faipule o le Palemene, ma afioga i Faamasino o le Faamasinoga a le atunuu.

A’o tapena ai la sui usufono mamalu o le Palemene e sua le au lapa uta ma le au lapa tai i saunoaga faalauaitele agai i le fuafuaga tau tupe fou a le Malo ua maea faataatia i le laulau a fono a le Palemene i le masina na tea nei o Me, o lea ua faailoa i le lomiga a le nusipepa o le Sunday Samoa, fuainumera o le a siitia ai totogi o i latou o umia tofiga taualoa, ma isi tofiga o le Malo.

O le Ao o le Malo o loo numera muamua i le maualuga o faamanuiaga tau totogi o le a ia maua, lea o le a siitia ile $220,000 afe i le tausaga ma ua aofia ai ma le 20 afe o alauni, faatusa lea i le totogi o loo ia maua i le taimi nei e $213,158 talā i le tausaga.

O le sui o le fono o sui tofia poo le sui Ao, o lona totogi o loo iai i le taimi nei e $110,376 tala i le tausaga, o le siitaga fou o le a ia maua ai i le tausaga le totogi e $124,232 talā. O le tofiga Palemia o lona totogi i le tausaga i le taimi nei e $202,639, o le totogi fou i le tuuaofa’iga ma alauni ma isi faamanuiaga e $213,153 i le tausaga. O le sui Palemia $174,683 i le tausaga le totogi fou faatusa i le $161,008 o loo maua i le taimi nei. O le tofiga fofoga fetalai o le a maua le aofaiga fou o lona totogi i le tausaga e $174,683 talā, faatusa i le totogi o loo iai nei e $149,970 tala i le tausaga.

O Minisita o le Kapeneta o loo maua i le tausaga le totogi e $149,970, a o le faatulagaga o totogi fou o le a siitia i le $168,458 i le tausaga. O Minisita lagolago o le totogi fou i le tausaga e $128,626 tala, Ta’ita’i o le itu agai o loo maua nei le totogi e $112,519 i le tausaga, o le totogi i le siitaga ua fuafuaina i le tala faatatau fou o le tupe e $125,026 talā i le tausaga. E faapena foi le sui ta’ita’i o le itu agai o le siitaga o lona totogi i le tausaga atoa e $120,026 talā i le tausaga, faatusa lea i le totogi o loo iai nei e $99,017 talā. O sui faipule mai Savaii e $127,200 talā i le tausaga ao faipule i Upolu e $123,600 i le tausaga.

O ia totogi uma ua iai ma faamanuiaga i vaegatupe mo alauni ma faamanuiaga i malaga ma fesootaiga tau telefoni. O le paea’iga lona 16 a le Palemene na mae’a ia Mati o le tausaga e 2021 na maua ai isi faamanuiaga i siitaga o totogi o sui faipule o le Palemene. O le tala faatatau fou o le tupe o loo aiaia ai foi se siitaga o totogi mo se vaega o tagata faigaluega a le Malo.