Ua toe faaopoopo nei le isi 9 senitimita i le mamao o le togi a le alii o Connor Bell i le pulu mafolafola ma ia tata’e ai se matati’a i lenei lava taaloga ma oo ai le mamao i le 66.23mita ma mautinoa ai le manumalo i le Maurie Plant Meet i Ausetalia.
Sa faatuina foi e lea alii 21 tausaga le National Record mo alii sinia i Hastings mo le mamao e 66.14mita. O se laasaga aupito i tāua lenei ia Bell ma lona olaga taalo ma ua atili ai ona iai le naunau ina ia ausia le mamao faatulagaina e agavaa ai i taaloga Afeleti a le Lalolagi 2023, lea e oo atu i le 67.00m le mamao e tatau ona maua.
O le taaloga togi pulu mafolafola na faia i le aso ananafi a o loma ai le polokalame autu a le Maurie Plant Meet lea e faia i le asō ma e oo atu i le to’a 14 le autaaalo afeleti a Niu Sila i le Gold Tour a le World Athletics Continental.
O Bell o loo umia matati’a mo Niu Sila i le togi pulu mafolafola a i latou e i lalo o le 20 tausaga le matutua, le U19, U18 faapea le U17 ma o le a tulimatai foi e le toatele ana taumafaiga i le sailiga siamupini a le NZ Track and Field Events i Ueligitone i le masina fou.
