Ua upuia le Coffee Club LynnMall i Sisifo o Aukilani i le o faatau mai keke mai le supamaketi la te tuaoi, ae aumai ma toe faatau atu i le tau toeititi 400% le sii.
I se tasi o ata video na pueina e se tasi ma toe faasalalau i luga o le Facebook o loo maua ai gaioiga uma nei na toe vaevae ai le keke $7.30 mai le Countdown ma maua ai fasi keke e 5, ma o le tau o le fasi keke e tasi na toe faatau i le $7.20
Na faamaonia ma lipotia e le Herald tautinoga a le tagata faigaluega a le Coffee Club e moni o le keke ma muffins lea na faatau mai le Countdown lea e faafesagai.
Fai mai ai le faatonusili o le The Coffee Club NZ, Andy Lucas e le faatagaina le gaioiga a le lala a le Coffee Club LynnMall lea na fai, ma o lea foi e iai lava le kamupani o loo faakonekarate e na te sapalaiina lala eseese a le Coffee Club e 63.
Na ta’ua ai foi e le faatonusili, talu mai le 18 tausaga talu ona ia amataina le Coffee Club i totonu o Niu Sila o le uluai taimi lea ua faia ai e se tasi o lala se mea faapea.
E lei ma’oti mai i saunoaga a le faatonusili poo le ā le aluga o le a oo iai le Coffee Club i LynMall ona ua lē usitaia tulafono, pau o lea ua uma ona fai la latou tala.
