O le a toe faaumiumi atu ona faaauau le taofia pea o le siitaga i tau o nisi o oloa a le supamaketi o Coles i Ausetalia nei a o faaauau pea ona feagai tagata ma luitau o le tau o le soifuaga i nei aso.
O Coles ma Woolworths e talitutusa lava a la faiga faavae na faailo i le ogatotonu o le tausaga na tea nei e faatatau i le tau o oloa ma tuuina ai ma le taofiga lea e le toe siitia se tau o nisi o oloa seia oo mai i le aso mulimuli o le masina lenei o Ianuari.
Peitai la o lea ua faailoa i se lipoti o le a toe faaauau pea Coles e ui e lei faailoa maia e le sooupu a le faleoloa le taimi o le a faamuta ai lea tulaga ae ua mautinoa o le a faaauau atu pea pe a mae’a le aso 31 o Ianuari.
O se faamama avega lea mo le toatele e pei ona faailoa foi e nisi i talafou. O le faleoloa o Woolies poo Woolworths ua mae’a lana polokalame lea ae ua faailoa ua o latou faapa’ū le tau o le silia ma le 300 o oloa e manaomia tele e le aufaatau aemaise lava i taimi o le tau mafanafana.
