E toafitu tamaitai taaalo lakapi mai Tonga ma Samoa ua filifilia mai le Oceania 2022 Rugby Womens combine ma o le a taaalo nei i le taamilosaga o le Super Rugby a Ausetalia i le tausaga fou.
Ua faamaonia mai e le ABC o le kalapu a le Western Force ua o latou ofoina se isi konekarate faaopoopo i le tamaitai o Saelua Leaula.
Sa faailoa le agaga fiafia o le tamaitai o Saelua ina ua faamautu atu e le kalapu a le Western Force lana konekarate ma o se avanoa tāua foi.
O Matthew Hodgson le pule o le kalapu na ia faailoa o se faaiuga lelei tele mo le agai i luma o le taaloga aemaise o le atinaeina foi o sea alo mai Samoa i le taaloga lakapi.
Fai mai Saelua ua leai ni upu e faamatala ai le agaga fiafia i lenei avanoa ua maua ma o le a faaaoga tatau foi sea faamanuiaga.
O isi alo o Samoa e toalua o Penina Tuilaepa ma Angelica Uila sa muai filifilia ae o le tamaitai o Saelua lea ua toe faaopopo atu nei ia i latou ua maua avanoa e atinae atili ai i le taaloga i le kalapu lea a le Western Force.
O Saelua poo le little general e pei ona faaigoa ai i le Manusina, sa avea ma sui o Samoa i le lakapi 7 faapea foi ma le taitoa 15 ma e faamautu i Samoa.
Fai mai Hodgson e ui o le konekarate masani e na o le tausaga ae o loo silasila le kalapu i se mafutaga faaumiumi atu.
O le toafitu atoa la ua filifilia mai le Pasefika e taalo i le Super W i le tausaga fou e aofia ai Florence Hakalo, Angelica Uila, Misky Paige, Saelua Leaula, Easter Savelio, Octavia Nanai Iafeta, Penina Tuilaepa ma Faalua Ioe Tugaga.
O Faalua Ioe Tugaga ma Easter Savelio o isi foi alo o Samoa ua ta’ua i le lipoti o le a taaalo mo le Melbourne Rebels.
