E lima tausaga le umi o le isi sootaga ua sainia nei e le Matagaluega o Aoga Taaloga ma Aganuu, ma le faatonu o le polokalame o alii ma tamaitai pisikoa mai Amerika.
O lea sootaga e ala i se feagaiga poo se memorandum of understanding ua sainia e le minisita o le matagaluega o aoga taaloga ma aganuu le afioga Seuula Ioane, ma le faatonu o lea polokalame a le Iunaite Setete i le lalolagi le susuga o Gini Wilderson.
O se sainigalima ua faafou ai le tulaga faaauau pea o le auina mai o pisikoa e galulue fesoasoani i nisi o auaunaga a le Malo e aofia ai le soifua maloloina, le matagaluega o faatoaga ma le matagaluega o aoga taaloga ma aganuu.
Ua 56 tausaga talu ona galulue fua pisikoa Amerika i lo tatou atunuu talu mai le tausaga e 1967 na taunuu ai uluai pisikoa ma ua lata i le lua afe le numera o i latou ua galulue i Samoa.
O le masina o Fepuari o le tausaga fou, o le a toe taunuu ai le isi aumalaga o pisikoa i le silia i le lua tausaga e le o faaauauina le polokalame ina ua toe foi uma pisikoa i le tausaga e 2020 ina ua pipisi le faamai Koviti-19.
