Ua lē mautonu nei le fale fono tele a Whangarei e faitau miliona lona tau, ina ua toe faamaamulu le malo.

O le fale fono tele lenei i Whangarei o loo iai ma le faletalimalo faapea apartments ma o se galuega tele na fai ma taofi, toe fai foi.

O le tausaga e 2020 na ofo mai ai e le malo le $60 miliona mo le Oruku Landing conference and event centre sau mai tupe o le Covid Response ma le Recovery Fund, sau ai ia Mati o le tausaga nei fai mai le Council a Whangarei na te ofoina mai le silia ma le $11 miliona mo le galuega.

E ese mai le malo ma le Council o lea foi e togimaa iai tagata inivesi taitoatasi e ala i le $140 miliona mo isi uma vaega o le poloketi e aofia ai le faletalimalo ma apartments.

Peitai i nei fuafuaga uma, faateia i le fai mai o le minisita o tupe Grant Robertson ananafi o le a toe solomuli le malo mai le lagolagoina o  lenei poloketi tele ona i le vaai a minisita e lē o lelei tulaga tau tupe o loo faatupeina ai le galuega.

O le ofo lenei a le malo ua faatolu ona faaopoopo le taimi ona e lē gata o suiga i taimi o faigapalota faaitumalo e tusa ma tala a le malo, ae faapea ai foi le tele o suiga mai le Council a Whangarei.

Ua lē fiafia le faatonusili o le Northland Development Corporation poo le kamupani o loo i tua o lenei galuega tele i le leai mai o le malo, ma ua fai mai ai o le a taumafai e feiloai ma le minisita o tupe pe aisea a o lea ua tele le laasaga ua oo iai ma o lea lava foi na mulimulitai i faatonuga mai le malo.

O loo lagolagoina e le pulenuu o Whangarei le faia o se talanoaga ma le minisita o tupe, ma o loo augofie foi e saofai ai ma ia.