Sa toe faaleaogaina foi faigamalaga a le Jetstar e ui ina o latou faailoa i le lua aso talu ai o le a lē toe iai pe faaitiitia foi le faatuai o le latou auaunaga.
I lipoti mai le initaneti i le asō ua faailoa ai o se malaga mai Melepone i le po anapo sa toe faaleaogaina ae ua mae’a ona check in le aumalaga ma o loo faatali i le departure gate e agai ai i le vaalele.
O se aiga e toaono sa tatau ona malaga ai i le vaa lea na o latou faamatala le lē fiafia tele i le tulaga na tulai mai. O loo lipotia foi e iai nisi o pasese o loo poloka pea i Hawaii ona o le faaleaogaina o le malaga atu mai Melepone sa fuafua e toe foi ane ai. Fai mai o mafuaaga tau inisinia na mafua ai ona faaleaoga lea malaga.
Fai mai ua toe ofoina i tagata tupe e 300 mo le totogi o faletalimalo ma le tai 46 tala mo meaai ae fai mai nisi o latou ua matuai le malamalama i nei fetuunaiga.
