O le asō na faalauiloa mai ai le faaiuga o le iloiloga a le Faamasinoga mo mataupu toe iloilo poo le Faamasinoga o Apili e tusa ai o le mataupu na toe apili ai e le vaega faaupufai a le HRPP le iai o le nofoa faaoopoopo lea na tofia mai ai e le Faamasinoga Maualuga i lana faaiuga i le masina o Me o le tausaga nei e faasino i nofoa faaopoopo o tamaitai. Ua faalēaogāina ai nei le nofoa faaopoopo o tamaitai lea sa filifilia i ai Toomata Nora Leota, ma toafitu ai sui tamaitai i le Palemene.
O le faaiuga a le faamsinoga lena na lauina ia Me na aumai ai ua aloaia le filifilia o isi sui tamaitai e toalua o le vaega faaupufai e puipuia aiatatau a tagata, le HRPP, le afioga Faagasealii Sapoa Feagia’i, ma le afioga Aliimalemanu Alofa Tuu’au.
Ae aumai le faaiuga lena, ua aumai ai ma le isi nofoa faaopoopo o tamaitai ma filifilia mai ai le afioga ia Toomata Nora Leota, ona fitu ai lea o nofoa faaoopoopo o tamaitai i le Palemene.
Peitai o le lu’i lena a le vaega e puipuia aiatatau a tagata na faaoo i le Faamasinoga o toe Iloiloga, ma aumai ai loa le faaiuga lea ua iai nei ina ia toe faalēaogāina se vaega o le faaiuga lea na tuuina mai ia Me ma filifilia ai Toomata Nora Leota, ma ua soloia ai nei lona toe avea ma sui usufono o le Palemene, ae faatumau pea nofoa o loo umia e Aliimalemanu Alofa Tuu’au ma Faagasealii Sapoa Feagiai.
Lona uiga o lea ua toe foi le numera o nofoa o tamaitai i le 6 i totonu o le Palemene.
O le faamasinoga lena ia Me, o le mataupu na tuuina atu e Nora ma ana loia ma le vaega faaupufai o le Faatuatua i le Atua Samoa ua Tasi, na lu’i ai le auala poo le formula na saili ai le 10 pasene o nofoa o tamaitai e fua i nofoa e 51 o le Palemene, ae na aumai le iuga o le faamasinoga i lena taimi, e aloaia pea sui tamaitai e toalua mo le vaega e puipuia aiatatau a tagata, ae aumai ai la ma le vaega i lalo o le aiaiga 1(E) o le mataupu 44(1A) o le tulafono, ua iai ma le tamaitai faaopoopo ua fitu ai nofoa lea na filifilia ai le afioga Toomata Nora Leota ae o lea na toe lu’iina lea faaiuga.
O le toe toesea ai la o le isi sui faipule o le Faatuatua i le Atua Samoa ua Tasi, e le o afaina ai le aofaiga toatele o le vaega faaupufai i totonu o le Palemene, o lea ua foi nei i le to’a 31 sui faipule.
Mo le vaega e puipuia aiatatau a tagata le HRPP, e ui e lē o afaina nofoa o ona sui tamaitai, ae ua faaitiitia nei i le to’a 19 ona sui auai ona o lea ua faalauaitele mai le faamavaega a sui faipule e toalua sa atoa ai le to’a 20 o latou faipule, e ese mai le taitai ma le failautusi o le vaega faaupufai, lea foi o loo faamalolo i le taimi nei mo le umi e 24 masina o la tofi faipule mai totonu o le Palemene.
Ua faamavae ese mai le afioga Ale Vena Ale, ma le afioga ia Tuuu Anasii Leota ina ua faailoa faalauaitele i le vaiaso talu ai i se latou feiloaiga ma le autusitala, ua la filifili e le toe fia avea i laua o ni sui faipule o le vaega faaupufai a le HRPP ae o le a see atu e avea ma sui faipule tutoatasi.
O se isi tatou tala oi luma o le a toe auiliili atu ai mafuaaga ua taunuu ai le faamasinoga i lana faaiuga e pei ona iai i le asō, lea ua faalēaogāina ai le tofi faipule o le afioga ia Toomata Nora Leota.
