Ua fuafua nei Ausetalia e faatauina le 220 o auupega o tomahawk cruise missiles mai ia Amerika i se maliega ua lipotia e silia ma le piliona lona tau.

O le fuafuaga lea ua ioeina e le US State Department, o le faatauina o auupega ia Ausetalia a o tālia ai se ioega mai le Konekeresi.

Ua lipotia o le fefaatauaiga lenei e ono silia ma le $895 miliona Amerika lona tau ma ua faamaonia mai e le minisita o puipuiga Richard Marles lenei maliega i le faatalanoaga i le polokalame o le Today i le asō.

Fai mai Marles o loo latou galulue nei ma Amerika i le maliega lea ona e tāua tele aemaise foi o le maliega i vaamaulu e pei ona faataunuuina i le ogatotonu o lenei vaiaso ma o le faamoemoe ia faamautuina le saogalemu o Ausetalia.

Ta’ua e Marles o ituaiga auupega nei e mafai ona oo atu i le silia ma le 1,600 kilomita le mamao e lele ai, lona uiga e mamao atu nai lo le malaga mai i le taavale mai Sini i Adelaide.

Ua ta’ua foi i le saunoaga a le alii minisita e tāua tele ia Amerika ona faalautele ma faatumau pea le malolosi o ana allies aemaise lava i le itu tau le puipuiga.