O le feiloa’iga ta’i vaiaso a le Sui Palemia ma tusitala i le Aso Faraile na te’a nei na logoina ai e le ofisa sinia o le ofisa sooupu i le matāgaluega a le Palemia ma le Kapeneta le afioga Nanai Laveitiga Tuiletufuga, tusitala i le toe amata ona faamalosia le tasi o ta’iala o le latou auaunaga, o le muamua avatu fesili tusitusia i ni matāupu e fia fesiligia ai le malo i ni tali, ma ua lē toe faatagaina ai ni fesili a tusitala e lē aga’i tonu i matāupu e folasia i feiloa’iga i vaiaso ta’itasi.
O le umi e faatali ai tali o fesili e le’i faailoaina ae o le tulaga foi pe maua tali o fesili i le taimi o feiloa’iga masani ma sui o le malo e pei o le Palemia, Sui Palemia ma Minisita e lē o mautū mai se tali.
Sa faia le faasilasilaga a le ofisa sinia ma faate’ia ai le vasega o tusitala, ae ua taunuu le Sui Palemia mo le feiloa’iga masani ma tusitala ma le aufaasalalau.
O loo tapena le ta’iala a le vaega o faasalalauga ma fesoota’iga a le ofisa o le Palemia ma le Kapeneta e faatonu folau ai le faafoeina o feiloa’iga a sui o le malo ma tusitala, ma ua mae’a ona feiloa’i ai le aufaigaluega o lea vaega o le matāgaluega ma sui o le Komiti Faafoe o le asosi o tusitala ma le aufaasalalau i se vaiaso e le’i mamao atu.
Ua tapena ai nei se fautuaga a le asosi e fausia mai manatu o auaunaga faasalalau eseese i le atunuu, ina ia tuuina atu i le malo mo lana faatofāla’iga a o le’i faamautū lana ta’iala.
O ia manatu ma tuualalo mai auala eseese o faasalalauga o le a fesoasoani ai i le malo i le faataotoina o le ta’iala e faatonutonu ai feiloa’iga a le malo ma tusitala ma le aufaasalalau.
O le fā tausaga ua tuana’i a o se’ei le ulua’i tama’ita’i Palemia ma le Kapeneta o le faigāmalo muamua a le vaega faaupufai o le Faatuatua i le Atua Samoa ua tasi, e le’i faaaogāina le ta’iala o le avatu muamua o fesili e tapena iai se finagalo o le Palemia i lea taimi.
Sa tatala le avanoa i le autusitala i taimi o feiloa’iga e avatu ai soo se fesili i ni matāupu e fia maua iai se finagalo o le malo.
