Ua polomisi mai le Pule Sili o le malaevaalele i Aukilani ua toe faafoi auaunaga masani ma foia le tele o faafitauli na aafia ai pasese i le malaevaalele, ae e iai lava itu o loo taumafai pea iai.
O le malaevaalele faavaomalo i Aukilani faapea le malaevaalele na o vaa feoai i totonu o le atunuu, o lea na matuai iloga ona faafetaia’i i luitau ina ua toe tatala tuaoi i le mae’a tapunia ai ona o le Koviti.
E le o toe po se lilo i le tele o atopau a pasese femalaga’i leiloloa poo le fiu foi e tatali, ma o lea ua faamautinoa mai e le Pule Sili Carrie Hurihanganui o lea ua toe sologa manuia.
Pau le itu ua faia iai suiga o le umi ona tutu mo siaki masani, ma mai ia Carrie o loo taumafai pea ma ua iai foi suiga faaopoopo ua agai iai.
Mo le lelei atili o lea o loo fuafua galuega toe faaleleia o le malaevaalele ma e tele piliona e moomia ai, ma o le a moomia ai le sii o le tau o landing fees lea e totogi e kamupani vaalele.
O siitaga nei e le o toe mamao faailoa mai, ma e le taumate o le a sii ai foi ma tau o pasese e totogi e tagata feoai.
