Ua faamalosia se tasi tamā mai Sini e tuua lona aiga, o si ona toalua ma lana fanau e toatolu ae agai ese ma le atunuu ina ua le tuuina i totonu e lana migration agent lana talosaga i le visa faapaaga e ui ua tele tupe ua maea totogiina. 

O si tamā e suafa ia Mohammed Bargachoun mai Bexley i Sini nei na malaga mai Lepanona ma faaipoipo ma lana paaga o se tamaitai Ausetalia i le 2019.

Fai mai o le mae’a o le faaipoipoga na totogi ai e le ulugalii le silia ma le $1,500 i se ofisa fai pepamalaga e fesoasoani ai i le talosagaina o le visa partner visa mo le tamā o le aiga.

E logonoa uma i laua ia e pei ona ta’ua i le lipoti ae faatoa la iloa ia Iulai e lei iai ma se talosaga ua faia i le visa ma sa alofia foi e le ofisa faipepa malaga tusi mai le Immigration. 

E ui i le faamalamalamaga a le ulugalii i le mataupu lea i le ofisa o femalagaaiga peitai ua tuuina ane lava le faaiuga a le ofisa e tatau ona agai ese le tamā o le aiga ma Ausetalia a o lei oo i le aso a taeao.

O loo tulituliloa e le ABC se faamatalaga mai le ofisa o le minisita o femalagaaiga e tusa o le mataupu ma se fesoasoani mo sia aiga aemaise e laiti foi le fanau a si tamā o loo aafia.