I le tuanai o le lua vaiaso ma ni aso o toe vaaia le saogalemu o le taitai o le vaega e puipuia aiātatau a tagata e se Malu o le Malo poo se leoleo, o lea ua toe taofia lea faaiuga i le finagalo o le Komesina o leoleo na faailoa i tusitala ina ua toe tuliloa lea tulaga i se fesili, ua mae’a le iloiloga ma ua mautu ai se faatatau e le o faamata’uina le saogalemu o le susuga Tuilaepa L Sailele Malielegaoi.
E pei ona silafia na mafua ona toe iai se leoleo e vaaia le saogalemu ma le puipuiga o le taitai o le pati faaupufai e puipuia aiātatau a tagata, ona o le mataupu na osofai ai e se tina na ia kola le laei o Tuilaepa a o agai i lana taavale i luma o le ofisa o faamasinoga i Mulinuu, ma motu ai lana faasolo.
O le lē fiafia o le tina i ni lafoga a Tuilaepa faasaga i le afioga i le tamaitai Palemia o se tasi o lona aiga, na mafua ai ona faia lea gaioiga.
E lei manao Tuilaepa e faaulu sana tagi i leoleo. O le tuanai o lea tulaga na aliali mai, na ave ai le manao o le taitai o lea vaega faaupufai i leoleo i se puipuiga mo ia.
