I le vaetama ai e se ulugalii Amerika o se teineititi mai Samoa sa tausia i le nofoaga o le faalapotopotoga o le Toomaga mo ē Puapuagatia ona o aafiaga tau sauaga.
O le fitu tausaga o nofo i Amerika ma ona matua na vaetamaina toe siitia atu i Niu Sila ma nonofo ai i le taimi nei, o se fiafiaga tele i le alii o Justin Kimmons Gilbert ma lona toalua le toe malaga mai i Samoa ma lo la alo teine na la vaetamaina faaletulafono e toe asiasi i le nofoaga na tausia ai, aemaise o le toe malaga mai e toe vaai lo la alo teine i le atunuu moni na fanau ma ola a’e ai a o itiiti.
Ua faailoa e le Pelesetene o le Toomaga, o le ulugalii Amerika sa galulue i Samoa i le ofisa o lea Malo, ma o le asiasi pea i le nofoaga a o iai i Samoa i ni tausaga ua tuanai sa o la feiloai ai ma le teineititi, ma tonu ai o le a la vaetamaina ina ua mae’a ona feiloai ma le tina o le teineititi ma aumai ai le ioega.
O le toe malaga mai ai i Samoa o le ulugalii ma lo la afafine ua mafai ai foi ona toe vaai le teineititi i tu ma aga faasamoa ia teu mau pea ia te ia, o lona faasinomaga tāua lea i lona tupuaga.
