O le tagata lea na soifua ane i Ausetalia ma ia faatupu le faalavelve na maliliu ai tagata e toa 51 i Kalaiesetete i le 2019 ua ta’ua mai i lipoti i le aso ananafi ua ia toe apili lona faasalaga.

O Brenton Tarrant o loo faasalaina e soloatoa i le falepuipui leai se palola ina ua ia ioeina moliaga e 51 o le fasioti tagata, 40 moliaga o le taumafai e fasioti ma se moliaga o faiga faatupu faalavelave.

Ua faamaonia mai nei e le Faamasinoga o Apili a Niu Sila e moni ua faaulu atu le apili a le alii lea i lona faasalaga ma le faaiuga ua faamaonia ai ona moliaga.

E le o iai se aso mautu ua faatulaga mai mo le taimi nei ae o Aokuso 2020 na lauina ai lona iuga ma e na te lei teena ai le faaiuga i lea taimi. 

I le tuuina mai o le faaiuga i le taimi lea sa ta’ua ai e le faamasinoga Justice Cameron Mander e leai se tausaga faatulagaina mo le palola ma o ana solitulafono ua ogaoga tele.

Manatua foi o le alii lea i le amataga sa ia teena ona moliaga ina ua sauni le faamasinoga ae faafuasei ona toe suia lana tali ma ioe i moliaga uma lea na tuuina mai ai loa le faaiuga a le faamasinoga.