Ua toe sau le tala o le isi vāea mo le aufaigaluega a le iunivesite a Massey, ma ua ta’ua e le iuni, o se tala faanoanoa tele mo le aufaigaluega.
E 125 isi tagata faigaluega o lea ua faailoa ane e le pulega o le iunivesite o le a vāea ma o i latou nei mai le faletusi, kolisi o le soifua maloloina faapea le kolisi o le saienisi.
O se tala ua faamautinoa mai e le sui o le iuni ua matuai faate’ia toe faanoanoa ai le aufaigaluega.
I lipoti o lea ua valaau mai le pulega o le iunivesite e ofo atu lava le tagata ia o loo manao e vāea poo le voluntary redundancy, ma o le 90 i le 100 tagata faigaluega o le a sau mai le kolisi o le saienisi, 15 i le 20 o le soifua maloloina faapea ai ma nisi o loo galulue i faletusi.
O se vāea ua toe sau ai e ui i le fesoasoani tupe e lei leva ona faailoa mai e le malo o le a faamatuu mai e fesoasoani ai i iunivesite i totonu o Niu Sila a o pa’ū ai le fuainumera o fanau aoga ulufale.
