O le Aso Lua o lenei vaiaso ua toe afea ai le uafu tele i Apia e se meli la’upasese ma se aumalaga o tagata tafafao mai atunuu eseese o le lalolagi.
O le MS Westerdam o le meli la’upasese muamua lea ua toe afea Samoa i le tuanai o le lua ma le afa tausaga o taofia le toe malaga mai o ni meli, ona o le pipisi o le faamai Koviti-19 i le lalolagi.
O le tasi lea o pisinisi tau femalagaa’iga sa matua olopala ai tamaoaiga o atunuu e pei o Samoa ina ua taofia uma ona o puipuiga o le faamai.
O le tausaga e 2019 na mulimuli afea ai Samoa e le meli o le MS Westerdam ma o lona toe malaga mai i lenei vaiaso ua aumai ai pasese ma le auvaa e 1,392.
Ua tapena e le pulega o tagata tafafao mai i Samoa faafiafiaga i luga o le uafu i Matautu i Apia e faafeiloai ai le pasese ma le auvaa, faapea foi ona faia se nofoaga mo se maketi i le uafu e faatau ai oloa o galuega taulima faapea laei elei ma isi oloa e manaomia e tagata tafafao poo tulisi.
Ua faailoa e le pulega o tagata tafafao e silia i le lima selau pasese o loo tafafao i itu eseese o le motu o Upolu, ma le isi toatele o le a savalivali i nofoaga eseese o le taulaga, ma nisi o le a tafafao solo i le taulaga ma nofoaga e tau lalata mai i le uafu tele, e faaaoga ai taavale laiti ma pasi la’upasese.
O le kamupani vaa o le Betham Brothers Enterprises poo le BBE o loo fai paaga ma le kamupani vaa o loo malaga mai ai le meli la’upasese o le Westerdam.
O le aso 20 o le masina nei lava o Oketopa poo le Aso Tofi o le vaiaso nei e taunuu ai le isi meli la’upasese, ma le isi meli ua fuafua e taunuu mai i le aso 23 o le masina fou o Novema.
