Ua mautū nei tapenaga mo le tauvaga e sa’ili ai se Tausala o Samoa mo le tausaga 2025 i le 2026, e pei ona faailoa ai nei i se lipoti a le Talamua, e to’asefululua tama’ita’i o le a tausinio.
I lea aofa’iga e to’avalu tama’ita’i mai Samoa, ae o le to’afā o tausala Samoa e to’alua mai Ausetalia i le setete o Kuiniselani ma Niu Sa Uelese, o le tausala Samoa mai Niu Sila ma le tausala Samoa mai le Iunaite Setete o Amerika.
O le Aso Gafua a sau, 27 o Oketopa e amata ai le polokalame o le tauvaga e sa’ilia ai se tausala o Samoa ma le faamoemoe o le Aso Toonai, le aso 8 o Novema e faia ai le tauvaga.
O le masina o Setema i le taimi o le Teuila e taualuga ai i le tauvaga lenei peita’i ona o le palota tele faafuase’i a le atunuu o le māfuaaga lea o le tolopo o le taimi e faia ai le tauvaga.
O le pale o le Tausala o Samoa o loo tauaveina i le taimi nei e le tama’ita’i o Litara Ieremia Allan, ma o ia foi o loo tauaveina le pale o le Tausala o le Pasefika.
