E toavalu tagata ua faaoo i leoleo a latou tagi ua tuuaia ai le tamaitai o Lyn Nauer lea ua faaamaonia e leoleo o lona suafa lea, ona o a latou tupe na ave e lea tamaitai ma le faaupuga e faagaioi ai o latou tusifolau ma isi vaega o a latou pepa mo galuega faavaitaimi.
Ua faailoa e le sui komesina o leoleo susuga Papalii Monalisa Tia’i Keti, e oo mai i le taimi nei o loo sailia pea Lyn Nauer poo se nofoaga ma se nuu o faamautu ai.
O le taulealea foi o Silao Leleiga poo Silao Faaleleiga lea o loo tuuaia i lona fao faamalosi o le ato a se tina tulisi mai Niu Sila, ua faaalia foi e le sui komesina o loo sailia pea e lei maua, ae o loo faagasolo pea suesuega i lana gaioiga na mafatia ai lea tulisi sa malaga tafafao mai i Samoa talu ai nei ma lana fanau laiti e toalua.
