E toa 8 tagata e iai sootaga i kegi ua molia nei atoa ai ma le ave e leoleo o tupe, auupega ma taavale i se latou suesuega ua atoa le masina o faagasolo i Rotorua. 

O le pepa mai leoleo i le aso ananafi na ta’ua ai lea tulaga ma faailoa mai ai e iai taavale ua o latou aveina atoa ai ma le lata i le 50 afe o tupe, o auupega o fana, lata i le 500 kalama o le fualaau faasāina o le aisa na maua uma i osofaiga na faia a leoleo i totonu o le tolu masina.

Fai mai la o le toavalu lea e aofia ai alii e toalima, tamaitai e toatolu o loo ta’ua e iai sootaga i le kegi a le mongrel mob.

O loo ua feagai nei ma moliaga e aofia ai le umia o auupega, gaosia o le aisa ma lona sapalaia atoa ma moliaga i isi foi laau faasāina.

Ua faailoa e leoleo o le a faaauau pea ona taulai a latou suesuega i kegi ma fualaau faasāina.