E toatolu tagata ua ave e leoleo ma taofia i lalo o le latou vaavaaiga i le mae’a ai o le o ane o i latou ia i luga ane o le motorway i Ueligitone ma valaau ai mo le toe faatuina o le passenger rail.
Na ta’ua ai e le NZHerald o le au tetee lea e toatolu na o latou aea le gantry i le taeao analeila ma faatautau ai se fu’a lanu uliuli ma lanu moli o loo tusia ai upu, restore passenger rail.
Fai mai se sooupu a leoleo e faamaonia ua o latou taofia le toatolu lea ma o loo fuafua e faia ni o latou moliaga.
Ua toe tatala le vaega o le motorway sa poloka e leoleo i le taeao analeila a o galulue atu i le aveesea mai o le toatolu lea.
O le faamatalaga mai le sooupu a le kulupu lea o loo faatinoina le tetee ua ta’ua ai e le māmā ia latou le faaiuga na faia e faalavelave ai i femalagaa’iga ina ia faailoa faalauaitele ai le latou mau i le faatumauina o le iai pea o auaunaga tau trains mo pasese i lea faaitu.
Fai mai o loo fai foi nisi a latou tetee i pitonuu e pei o Dunedin, Nelson ma Aukilani.
