O lē sa avea ma Loia Sili a le Malo i tausaga ua tuanai le afioga Taulapapa Brenda Heather Latu, o le uluai tamaitai Samoa ua filifilia e le pulega o le lakapi i le lalolagi, e avea ma se tasi o taitaifono o komiti o le a suesueina ni aafiaga o tama lakapi a o feagai ma taaloga i le taimi o loo faagasolo le Ipu o le lalolagi i Farani i le tausaga nei.
Ua faailoa e le pulega o le lakapi i le lalolagi i latou ua filifilia e feagai ma lea galuega amata mai i Komesina, faasolo ane i taitaifono ma sui o komiti o le a suesueina ni gaioiga a tama lakapi e solia ai tulafono o le taaloga.
Ua aofia i le afioga Taulapapa isi tamalii e toalua o le atunuu sa taaalo lakapi mo Samoa ae o loo faamautu i Niu Sila, o le susuga Mika Mika ua avea ma faamasino i totonu o Aotearoa, ma le afioga Aiolupotea Tonuu Ofisa Jr Tonuu.
O se matati’a lenei ua ausia e lo tatou atunuu ma le maualuga o le atina’e o le lakapi iuni, ua agavaa ai se tamaitai sa avea ma Loia Sili, ma nisi o tamalii sa tautua i le aulakapi o le Manu Samoa i se faaiuga a le pulega o le lakapi i le lalolagi, e avea ma sui o atunuu i lenei faaitulagi o le Oceania e tagofia suesuega o solitulafono i le faatinoina o le taaloga i se taamilosaga o le Ipu o le lalolagi.
O le masina o Setema ia Oketopa lea taamilosaga e faia i le atunuu o Farani i le tausaga nei.
