O le tomai a’oa’oina i le musika o se tasi lea o matātā poo agavaa ua siitia ai le soifua auauna o nisi o malu o le malo o loo i totonu o le faaili a leoleo.
O ia a’oa’oga ua faaeaina ai sa mafai ona ausia ona o a’oa’oga i atunuu i fafo ma ua faaaogā nei e saga faaleleia ai le faaili a leoleo o loo tautuaina le Malo ma le atunuu i soo se sauniga.
Ua faailoa e le matagaluega o leoleo, falepuipui ma le toe fuata’ina le ausia e le leoleo satini sinia le susuga Tavita Tunupopo o se tulaga maualuga i le a’oa’oga mo ta’ita’i o faaili poo band leaders, ae o le leoleo taailua le susuga Carmen Tausili na manumalo i le tauvaga musika o le New Zealand band solo competition.
O ia foi le ulua’i malu o le malo mai Samoa ua na ausia lea tulaga.
O le alii leoleo poo Constable Tagata Saleutogi ua faamanuiaina i le a’oa’oga o tomai faamusika e ta’ua o le MAP musician course ma ua fesoasoani malosi lea i le siitia ma le faaleleia o le faaili a malu o le malo o Samoa.
O le satini sinia o Tavita Tunupopo sa auai i se a’oa’oga i le aoga faamusika o le fitafita a Niu Sila ma faamanuiaina ai i le tulaga ua ia ausia faapea foi le leoleo taailua o Carmen Tausili.
