E tulaga ese le aofai o tagata Niu Sila ua ma’umau soifua i le malelemo i vaitafe ma le sami i aso ua tuanai ma ua faamatalaina i se lipoti i le asō o se mafatiaga tausoa e le atunuu atoa.

O le vaega a le Surf Lifesaving NZ ua faalauiloa maia le lipoti lea ua ta’ua ai e 424 tagata na malelemo i le 10 tausaga talu ai.

O le lipoti faaletausaga lea ua atagia mai ai le toatele o tagata Niu Sila ua ma’umau soifua o na o lea mafuaaga ma e 46 tagata Niu Sila na malelemo i gataifale o Niu Sila i le va o Iuni 2022 ma Iuni o le tausaga nei 2023.

Fai mai le faalapotopotoga o soo se soifua e ma’umau o mafatiaga foi ia e faalogoina i komiuniti ma aiga ma ua manaomia vave se isi gaioiga faaopoopo mo le faaitiitia o lea aofaiga.

Fai mai o le silia ma le 10 tausaga talu ai e 38 pasene o tagata e malelemo mai i matafaga ma gataifale ma e mātele i le itupa o alii.

E 86 pasene o i latou ia na maliliu o alii ma ua tuuina mai ai foi ma se lapataiga mo le atunuu ia silasila i tulaga tau le puipuiga aemaise i tafaoga o le Kerisimasi i matafaga ma vaitafe.